“…parivatu l’ultimu ma eratu ‘ntesta“. Le poesie di Giovanni Salvo
CARU LILLIDDRU
Caru Lilliddru quantu nni’ manchi,
lu to sicarru, li to passi stanchi
La virdureddra misa a cucuzzu
li to’ parulazzi jttati a muzzu
Parivatu l’ultimu ma eratu ‘ntesta
senza di tia nun c’era la festa
A vuci forti ppi tutta la chiazza
la to curriola, la to varbazza
Eranu tosti, sicchi e accatastati
ligna ruventi gia’ staggiunati
A San Gniseppi di tutti li santi
facisti faiddri, li vampi cchiu’ anti
Campasti liberu tra li carzarati
di la menti a lu denti cu du vrazzati
Lu tascu ‘ntesta bonu ‘ncarcatu
fora lu grasciu ma di armu sciacquatu.
