“… cca’ appartiegnu”. Le poesie di Giovanni Salvo
DI CCA’ VIEGNU
_*_*_
cca’ appartiegnu
a sti vaneddri vacanti
a stu giacatu ca era lucenti
a lu jssu cadutu di stu muru di rocchi
di cca’ viegnu
di sti strati di ginisi
di lu biancu pruvulazzu
di stu trubbu ca divintava sapunata
cca’ appartiegnu
a sti cristalli di surfaru pizzuti
a sta petra gialla supra lu como’
a sta vecchia citalena ca pinnuliava
di cca’ viegnu
di lu pupiddru d’acqua
di li basulati di la chiazza
di sti barcunati arruggiuti
di sti canala di crita ca nun arriparanu cchiu’ a nuddru.
